قست الحبيبه

موضوع: قست الحبيبه الأحد نوفمبر 27, 2011 8:54 pm

قـست الحبيبـة ..

كلمات : صـديق محمـد طـه
ما قالو الزمــن بينسى نان عاد مالو ما نسّاك
ويوم قِسَت الحبيبه عليك مالو قساها ما قسَّاك

باريت الحنيــن والذكــرى وكم مشت الهموم باراك
واتشابك زمانك حســره من سابك ربيع دنياك
حنَّست الجــراح لو تبرا بى صوت صبرك الجواك
وقفت لك دموع العبــرة يوم فات الصبر خلاك

زمان اتحتّ صفق الريدة وبدلت الحبيبة هواك
ولو ما كنت صح بتريده ما كان الفراق هــزّاك
لكن برضو ياها القسمة مقسومــلك تعيشو شقاك
تفارق للسعادة ...البسمة وسمحاً عشتو فى يوم داك

يا اللسّع حنيّن وافــى مسكين يا حليلو وفاك
تفتش فى حبيباً ما فـــى ناسج بى رجوعو غناك
خطــوك فــى بعادو قــوافى حد ودِّيتو ما لاقاك
بكيت غلبك تيقن قلبك وحيّرت القصيده معاك

وطالتبك سنين الوجعه ساهــر فى الليالى أساك
دايماً فــى بحور الدمعه باكــى على رحيل مــــرساك
وماك قادر تضارى اللوعه من سهـــر النجوم وحجاك
كتال الولــف يا صاحـــى يا اللامس حقيقتو بــراك

متين تنسى الحبيب والامــو ياقلب المآسى كفاك
بيعدّى الحزن ايامو حزنو مالو ما اتعدّاك
شايلاك السنين تتجارى وكم وقّف جـــريها بكاك
لا طوت الحبيبة بعادا ولا قِدِر الزمــــن نسَّاك
[ندعوك للتسجيل في المنتدى أو التعريف بنفسك لمعاينة هذا الرابط]