أحكي ليكم قصة غريبه .. قصة زول شال غلبو وراح
أول مره تشكك فيها .. وتتخيلا تبقالك صاح
***
من شافع ما فك الأول .. وكل سنينو قضاها نجاح
لامن دخل الجامعة تفوق .. قامت وقعدت لو الأفراح
كان في طموحو مهندس بارع .. ولا يكون دكتور جراح
خمسة سنين للجامعة يساسق .. لا عطلات لا يوم أرتاح
***
وإتخرج .. ساعة ما أتخرج .. فكر يمشي يكوس لو وظيفة
فوقو ديون من أمو وأبوه .. يسددا قال من مهنة شريفة
ياكل ويشرب .. حامد شاكر .. حتي إن ما فضلت تعريفة
وأوضة الطين وضل الراكوبة .. عندو أخير من قصر الباح
***
خمسة سنين صاحبنا بيجري .. وكل الدور تقفل أبوابه
شان لا عندو وسيط يمشيلو .. لا بالفيهن عندو قرابة
خمسة سنين راحت من عمرو .. ويبقي معاها كتير الراح
***
فوق الخامسي ردف للساتي .. همو أكشاك ومحلات شاي
يبقي يصادفو إعلان في جريدة .. ولا من الجالسين الرأي
قعدتو قعدة زول مشلهت .. وفكرو يدولق غادي وجاي
فعلاً صادف شركة بتعلن .. عن أشغال ورواتب صاح
***
قرب يصرخ من الفرحة .. لامن خشمو أخدلو رعيشه
هز جيوبو عشان يشريها .. تاني اتنازل عن فتيشه
أتذكر في أسبوع كان قوتو .. دردوم دكوة ونص العيشة
في الآخر أكتفي بي نظرة .. وروح قابض غلبو الشاح
***
ما نام لامن باكر بدر .. وزادو معاه الخرم الجوع
سجلوا إسمو وشافوا أوراقو .. ووعدوا يجيهم بعد أسبوع
وراح يحلم بأنو أتعين .. ورقو مدير فوق عشرة فروع
وفجأة أستيقظ صنقع دنقر .. وقال يازول ربك فتاح
***
بعد أسبوع .. وراجع للشركة .. ناقش نفسو في أمر غريب
ليه سيد الدكان ما رد .. (صباح الخير) مع إنو قريب ؟!
وليه كمساري الحافلة اتعدي .. وما طقطقلو وقالو تجيب ؟!
وليه لمن واقف يتسرح .. صورتو أمامو بقت رحراح ؟!
***
غايتو أتناسي وقدم ورقو .. والمسئول سامع وما شايف
غير أوراق من مافي اتمدت .. واستقبلا استقبال خايف
وراح مفزوع يسأل في نفسو .. (حتي الجان ما لاقي وظايف)؟!
باكر بمشي وأخلي الشركة .. طالما الشركة أتملت أشباح
***
رد عليهو الصوت من تاني .. أرجع ولا تسئ التفكير
أنا إنسان عايش بيناتكم .. إلا اتلاشيت بالدردير
وما دام ما لي قسمه معاكم .. هاتو أوراقي وشوفو الغير
وظل الزول ظاهرة كونية .. وما معروف للناس وين راح !!
