بحلم بيك ما فت الخاطر ياريت يبقى الحلم حقيقة
ياريت الايـــام تجمعنا وفيها نعـــوض كل دقيــقة
***
يا راجياني عشان أهديكي غنوة ريد في صورة أنيقة
ماك متخيلة ينظم شعري يغرق فكري في اه عميقـــة
انا ماعــــدت الزول البيفرز مابين النـــار والتاتيقــة
دمعة علي لوحة أحزانة رسمت في الاقدار بي ضيقة
***
لاتلوميني ان مارسلت حتى ان كان سطرين في وريقة
لومي متاهت الغــــــربة الفيها منها ما بتنشلة طريـــقة
تنشد حــــالك وتشــــرح حال الزول المالاقيلو وتيقـــة
شوقك وشوق الوطن الغالي مضروبين في صدرو بديقة
***
وينك منو وينك ليهو وين أمالو ووين تحقيقة
دايمن يقعد في اوهامو يبني وتتهدم السريقة
فكرو يساسق بينك وبينو لا رتاح لا مل الساسيقة
كم ابواب في وجهو انسدت زي ما الرجعة انسد طريقة
***
وينك لما شمشنا تغرب رغم الموجة يصلنا بريقة
لما الموجة تعانق الضفة في تحنان تغسلة رشيقة
وافضل اتابع السرب العايم في نظراتك والحديقة
فجأة تشع من ثغرك بسمة وتأسر قلبي وروحي تشيقة
***
راجعليك يابت عندية ودخلت قلبي في ساعت ضيقة
حلفت ماتمرق بي هيني اتعزفت جواي مزيكة
شالو النمة معاهة تلاتي متهكرين في ضل كليقة
سكنو جوف الليل الكافر شان الصبح تشق قارسيقة
***
راجعليك يابت ريفية وتخفي سماحتها في التاويقة
لا عارض يمنع مســــاري للأيام خطواتي تعيقــة
راجعليك رجوع النسمة الجات في الحقل صفيقة صفيقة
كان الناس عني دربي اتخلو انت بتمشي معاي رفيقة