بـلا ميعـاد
بنتظرك بلاميعـاد
بينك والأماني يطول رجا الفرح المشا وما عاد
تعالي مع الزمن موال أمدو على ليـالي السو
أدندن بيك علي الحجرات وللنسمه المباري النــو
أصفق والقمر يرقص مع الموج المراقص الضو
أطنبر بيك للأشواق
وأسمعك أي زول مشتاق
وأكتب لا القلم عاجز ولا يوم جف فــيه مـداد
تعالي ندرج الأيام على درب الهـوى الويحيد
نلملم من فراقنا كلام نلحنو يوم لقانا نشــيد
غيابك بح صوت الناي وراك تاهت غناوي الريد
طلي من الصباح اشراق
يراري على ندى الأوراق
يصحي عيون فراش حائــر على خفر الغصين الناد
تعالي بلا خبر برجاك على وقد الهوى المقدوح
وعلىالحزن البعاقب الهم وهـم روحا يسل الروح
يشحتفه ديمة بي أشواق بسيمتك والوشي المطروح
أنادي عليك من الأعماق
أشارف والفكر تـاواق
يشاشي على مدن عينيك ويرحل من بلاد لبـلاد
أدخلي ووزعي الأفراح على كل البيوت في الحي
وأبقي غنيوة القاعدين ومساديـر البشقو الصي
دا كان اخر كلامي معـاك دا كان آخر حديثك لي
وقت كان الزمان حواق
قبل ما يجري بينا فراق
قبل ما تهب رياح البين وتكشح فوق وجوهنا سواد
بنتظرك بلا ميعاد موهدب الا كلي عشم
على عتب الأمل ساند ضهر صبري النقص ومـا تم
تعالي أيام زماني جحيم بلاك وشي حياتي سجم
بيني ولو على الآفاق
بدايات المطر نقناق
مطر فرحك على الأحزان حديثا تاني مابنزاد
